गैजारोङैनि जिउ

महन दास मुंनि माहाजोननि न’खरनि सावगारि । नोगोरनि सासे गेदेर माहाजोन महन दास बिथाङा । ग्रोम ग्रोम बारि बागान, सारि सारि गय बिफां लारि लारि, जेनिबो आंखाल गैया । न’खराव गासै गावसोर साब्रैल’-बिसि, फिसाज्ला आरो फिसाजो सासे । गासैबो गाव गावनि हाबायाव मुखुब । न’आ थाम थाला गोनां, गोजौथारनि खोलोबाव माहाजोन बोराय-बुरै थायो, गेजेराव मोनसे खथायाव फिसाला आरो गुबुन मोनसे खथायाव फिसाजो । बेनिफ्राय गाहायथारनि खथायाव आंखौ दोनफैनाय जादों । खथाया आंनिया मोनामब्रुंब्रुं एन्जर-फारौ आंजोंनो उन्दुफायो बुंजायो । न’खरनि मानसिफोरखौ मोनानि समावल’ ज’ नुयो । अखा नायब्लानो बहा बहा थाङो जेबे मिथि मोना । बुंनो थांब्ला आं जेबो मिथिथ’वाखै मोनोना आंबो बारा गोबाव जायाखै बे न’आव खामानि मावबायग्रा दाहोना जानानै थाफैनाया ।
सोरांस्लाब मोनै साहा फुदुंनायनिफ्राय लानानै ओंखाम-ओंख्रि संनाय, थोरसि-लथा सुनाय, बायदि बायदि खामानि आरो बारिनि खामानिखौबो आंनो मावनांगौ जायो दा । हिन्जाव महरै जोनोम मोनाखैब्लाबो गासिबो हिन्जावनि खामानिखौनो खर’ सायाव रुजुन्ना लानो गोनां जाबाय आं । फरायसालि नागारनायनि साजाखौ आं दासो मोन्दां हानायबादि मोनबाय । बै समावनो मोजाङै सोलोंलांनायब्ला दाहालागै माबा मोनसेसो लामा ओंखारलांसिगौमोन जानांगौ । नाथाइ बाराबो बुंजाया, आंदि मानो फरायसालि नागारनांखो बेखौ रावबो मिथिया । आंनि जिउआव मा दावहाजों बुसोम जादों, माबादि हालाय-हाफाय जानांदों बेखौ आंल’सो मिथिगौ ।
गसाइयाबो जायखौ सोरजिदों मोजाङानो सोरजिदों, जेनिबो आंखाल गैयै । नाथाइ आंखौ मा खाफालै सोरजिखो जेनिबो आंखालजों बुसोमजानाय जिउ । बिमा-बिफा बोराय-बुरैया खुथार-खुथार हाजिरा-खामला मावबायबायनायखौ बोरै नायना थाबाय थाबावनो । फारसेथिं बिनानावआबो देरबोनो हमदों । बिनि फरायनाय-लिरनाय, गान्नाय-जोमनाय होनांगौ बिबाना दा आंनि सायाव गोलैबोनो हमदों । बेखायनो आं बेबादि हालोदाव बोरै थाबाय थानो होन्ना लाजिनाय-बानाय नेउसिनानैबो फरायनायखौ नागारनानै दाहोनानि लामाखौनो लानांगौ जानानै फैदों । बहा मोनगोन बहा मोना जाना थानाय समावनो मोनसे गलायाव बिथां महन दास बिथांहा गोनां जादों होननायलाय रादाय बायदियै दा बिनावनो थाफैबाय आं ।
खामानिया आंनि सोरांस्लाब मोनै फुंनि 5 बाजिनिफ्रायनो जागायो । इखनब्ला थाब सिखारनो रोङाब्ला रेडिअ’ सेन्टारनिफ्राय फैनायबादि थेव थेव बखिनाय माहाजोन बुरैनि रायनाय राव । बुंनो थांब्ला माहाजोन बुरैनि खुगाया दाव बिमा रांखिनिनि खुगा बायदिथार । सिखारदवाब्ला मा खोनासंनो जायो बेखायनो आं समनि आगोलनो सिखारखायो । मादि जिउ जालांखो आंनि जिउआ जेबो ओंथियानो गैला गैजारोङैनि जिउआ । आं सानो आंनि जिउ बायदि जाहाथे रावनिबो जिउआ बिब्दि अलखद दाजाथों ।
सिखारखां-इरिखां साहा फुदुंनानै लाबोनायसै आं । बयनोबो साहाखौ रान्ना होनायसै । बुंनो थांब्ला फिसाजोआ बिमानि लादों, बेयो आंनि संनाय-खावनायखौ मुगैबांसिन जायो । आरो नै दाबो आं साहा फुंदुंना लाबोनायखौ मुगैबांसिन गरदनैसो लोंनानै फिनज्राब गारहरदों । आरो बुंदोंबो बियो-
: बिकारी निचीना देकिसे देकून, एमान लेथ्रा मानु सि... बर’ जाति । कत परा आनिसे ऐतू । (रागाजों बुङो)
आरोदि गावसोर मा मा सावरायबावो जोंनि हारिनि बारै आं खोनायि गोबां दं । आं सानबाय जे एसेबां मुगैनो रोंबाय बिसोर दिनै जोंनि हारिखौ...। जेन’ आंखौल’ मुगैदोंमोनब्ला आंहा बेयाव एसेबां साननो गोनां गैयामोन । नाथाय हारिनि गासैखौबो मुगैनायाव आं गोबां दुखु मोन्दों । थारैनो आं गैजारोङै निखाउरि जानो हागौ नाथाइ दा जोंनि हारिया बेबादि निखाउरि नंलिया । दं जोंहा गावनि आंगो दोहोरोम-हारिमु, गान्नाय-जोमनाय, मोसानाय-मुसुरनाय । सानसे समाव बर’फोरनि आंथिं सुग्रामोन बिसोर नाथाय दा बिसोर जोंखौ मुगैनो रोंबाय ।
आं गोबां फरायनो मोनाखैब्लाबो सानसे समाव दैदेनगिरिया मेलआव बुंनाय खोथाखौ रोखा-रोखा दाबो गोसोआव दंदि सानसे समाव बर’ राजाया रायजो खुंनाय समाव गुबुन हारिफोरा बर’नि आथिं सिंआवमोन । बै समाव बर’फोरखौ बिसोर मोदायबादि सिबिदोंमोन । नाथाय दा मा नुखो बर’फोरखौसो बिसोरो गलाम बाहायनो लामा लाबाय । बुंनाय बादियै आंबो दा गलाम बैनो गोनां जादों गावनि उदैखौ सुफुंनो आरो न’खरखौ नायनो थाखाय । गोसोनि सान्नाय गोसोआवनो दोनो आं, बिसोरजों आं बाथ्रा दान्थेनो हाया, मानोना आं बिसोरनि गलाम । आंनोबो दा रांनिल’ आंखाल । मा खालामनो खोनासेयावबो खुदै मन’ना थानांगौ जानानै फैदों ।
नखरावबो दा जोबोर जारयाव दं होनना मिथिदों, दहाय सासे सिनायनाय सुबुङा आंनो खिन्थादों आइया हरखाब गोब्राबै लोमजादों होन्ना । दा आइखौ नायहैनोबो आंखौ हगार हरनाय नङा माहाजोन हिन्जावा । मा खालामनो, आयखौ सानबाय बायना मोदै हुगारखुमानायसै आं । हरखाब गोमायोब्ला आं माबोरै सहाय हागोन जोबथि समावबो बिमानि मोखां नुवाब्ला ।
मोनानि ओंखाम जाखांनाय उनाव खामानिफोरखौ फोजोबखां इरिखां बायदि मैया सानहाब बायनानै मेंग्लिनाय सोलेरजों माब्लाबानो दो उन्दुलांदों आं ।
: ऐ गथ’ मा दाबो सिखाराखै, सोराङाखैने, सानानो बिसनायाव नांहैसै हनै । (दरजाखौ थक थक बुनानै)
आइनि बिब्दि रावजोंसो सिरि मोन्दों आं । नुबाय आइया दर बुयै बुयै फोजागासिनो दं आंखौ । साना माब्लाबानो गोजौ जौथारबाय जानांगौ । मानोना सान रानिया गेजेर गेजेर आंनि खथायाव लाजिया फांजिया हाबफैना आंखौ फोजाफैदों । थेवबोनो सिरि मोनाखैमोन नाथाय आइनि रावावदि मा जादु दं फंसेयावनो सिरि मोनगारबाय आं । दान्दिसे बिसनायाव जिरायना एसे सानखांफिननो नाजायो आं दिनै माबोरै बेबादि सिमां नुखो आंलाय ।
गैजारोङैया बिदिनो गुबुन हारिनि आथिं सिङाव बेसेबां थाबाय थाबावनो...। बिसोरनि दुखुखौ सोर आय’ होनबावनो...। जोंनि हारियाव गैजारोङैनि थासारिखौ माब्ला फोजोबनो हाबावगोन बेफोरखौ दसे सानहाबना हांमा गोलाव सुरनायसै आं ।
मोखां सुखां-इरिखां आरांगायाव बिजाब फरायनो लाब्ला नुनाय सिमांनि खोथाखौसो मोनसे सल’ जोनोम होनो गोसो जागारनानै रेबगन दैनायसै आं । दोन्नाय जानायसै बिब्दिनो सल’नि मुंखौ “गैजारोङैनि जिउ” ।
~(जोब्बाय)~
x